Beim heurigen Gautrachtenfest des Chiemgau-Alpenverbandes für Tracht und Sitte in Reit im Winkl wurde beim Festgottesdienst auch und besonders der Toten und Verstorbenen gedacht. Nachfolgend im Wortlaut das Gedenken – gesprochen von Zweitem Vorstand Christoph Bauer – und die voretragenen Fürbitten.
Liabe Trachtlerinnen und Trachtler,
der GTEV Dö Koasawinkla Reit im Winkl, insere Gödein de Gederer Rottau, de Achentaler Unterwössen, da GTEV Prean und da Chiemgau-Alpenverband gedengan heid am Dog von inserm 122 jährigen Gründungsfest und dem 85 Gaufest vom Chiemgau – Alpenverband, ganz bsonders insana g´foina und verstorma Vereinsmitglieder. Vor 122 Jahr ham se a paar Mannerleit aus Reit im Winkl, vo de umliegenden Ortschaften und Bergbauernhöf z´amgfundn und ham dakennt, dass inser Volksguat, Brauch, Sitt, Tracht, Volksliad und Volkstanz, – as überlieferte Erbe eanana Väter – a de G´fahr grot, vergessen z´wern. A Hand Voi Mannsbiada ham am 28. April 1901 an GTEV Dö Koasawinkla gründ und ham se des Ziel gsetzt, Sitt, Tracht und Brauchtum insana scheena Hoamat zum dahoidn.
Stellvertrtend für olle Gründungsmitglieder soid heit da Namm vo inserm Gründungsvorstand Thomas Sachenbacher gnend wern. Vui vo insane Mitglieder ham a de zwoa sinnlosen Weltkrieg auße miaßn auf de Schlachtfelder Europas, wo sie eana kostbarstes, – eana Le´m, gem ham. De wenigen de hoamkema san zu eanane Leid ham sie wieda an den Auftrag eanana Kameraden und Väter erinnert und an Trachtenverein zu neiem Lebm erweckt, und zu neia Blüah brocht. Heit gebührt a de Gfoina und Gstorma insa aufrichtigs Vergelts – Gott, denn sie warn die Gründer vom Trachtenverein, sie warns, de ins de Tracht und d` Hoamat so schee dahoitn ham. Mia sand`s eana schuldig, dass mir Treu dem guat´n oidn Brauch, d`Hoamat und inser Brauchtum so dahoidn und an insere Kinda weida geb`m, wia`s es ins überliefert hab`m.
Leider hat a in de letzten Jahr da Tod tiafe Wund`n in insere Reihen grissn.
Stellvertretend für olle, nenn i heit inserne ois letzt´s verstorma Ehrenvorständ, an Fleindl Done, der 2014 verstorm is, an Lehrberger Hubert der 2015 verstorm is und an 2018 verstormna Franz Mühlberger. Alle drei war´n Träger vom goldenen Gauverdienstzeichen. A inserne leider vui zfria verstorbenen Vorständ, am Hans Bauhofer und am Graz Mühlberger woin mir heit bsonder´s Gedenken! Da Hans und da Graz warn federführend dafür verantwortlich, dass mir heit des 85. Gaufest vom Chiemgau – Alpenverband ausrichten deafan. Zum Gedenga an Sie – und zum Gedenga an olle gfoina und verstorma Trachtla des Chiemgaus, werd in dera Minuten von de Aktiven Buam, ois eißeres Zeichen insera Verbundenheit, im Nama vom GTEV Dö Koasawinkla und im Nam vom Chiemgau-Alpenverband am Friedhof a Kranz nieder´glegt. Herrgott gib eana de ewige Ruah.
Fürbitten Gaufest Reit im Winkl
Für alle Trachtler: Leonie Hagemann
Liaba Hergott: Mia Chiemgauer Trachtler ham ins vor Jahren den Leitspruch „Jung und Oid mitnand“ auf inser Banner gschriem. Bitte gib ins de Kraft und des G`spür, dass mia a in Zukunft oiwei für a miteinander stengan, inser Gemeinschaft für alle Trachtlerinnen und Trachtler da is und neamd ausgschlossen wird.
Für unsere Hoamat: Rieder Bärbl
Liaba Herrgott: du host ins des scheene Land zur Hoamat geb`n, bewahre es vor Naturkatastrophen und Unglücksfällen und hiaf ins, dass ma verantwortungsvoll mit deina Schöpfung umgengan und sie für de nachkemmad`n Generationen bewahren
Für den Frieden: Christoph Bauer
Liaba Herrgott, mit Sorge schaun wir in de Ukraine und nach Russland. Bitte haif das de Vernunft gwinnt, und des sinnlose Blutvergiaßen im Osten Europas und auf da ganzen Welt endlich a End hat. Gib uns de Kraft de Erkenntnis zu erlangen – erst wenn de Macht der Liab, de Liab zur Macht übersteigt, – werd´s Frieden gem.
Kinder: Speicher Magdalena
Liaba Herrgott: Vui Probenarbat, Fleiß und Zammahoit steckt hinter insam Kenna (Können). Huif ins und insane Jugendleiter das wir a in Zukunft so guad zammhoit´n und ins de Freid an da Trachtensach nia ausgeht!
Jugend und Aktive: Willers Andal
Liaba Herrgott, Ob Freizeitangebote, de Schui, oder de Ausbildung, mia Junga Trachtler ham´s oft ned leicht ins auf insere Wurzeln zu konzentrieren. Bitte haif ins, wenn´s drauf o´kimmt, de richtigen Entscheidungen zum treffa, und gib uns des G`spia und des Verständnis wia wichtig inser Brauchtum, de Hoamat und de Kultur für a Gesellschaftliches zammaleb´m sand.
Für unsere Verstorbenen: Neumaier Mich
Liaba Herrgott, Leuchtende Tage, – nicht weinen, dass sie vorüber, – lächeln, dass sie gewesen. Mit diesen Worten woin mir heid inseren Verstorbenen und bsonders insere zwoa leider vui zfria verstorma Vorständ am Hans Bauhofer und am Graz Mühlberger Gedenken:Vergellt eana Ois Guade des Sie für ins und insa Trachtensach do ham, nimm Sie auf in de Himmlische Freid, und schenck eana dein himmlischen Frieden.
Fotos: Theresa Fritzenwenger, Gaupressewartin Chiemgau-Alpenverband – Blumenkranz zum Gedenken an die Verstorbenen des Festvereins und des Chiemgau-Alpenverbandes im Friedhof von Reit im Winkl
