Halloween
Geister geistern geisterhaft,
vor lauter Schreck bi i ganz gschafft!
Ja, wos is denn heit bloß los,
de Schreckgespenster feiern groß!
Auf da Straß de Geista wusln,
heit is a Dog zum Grusln!
Kürbislarvn stehn vorm Haus,
manche schaun recht schaurig aus.
In oide Kuttn Kinda steckan,
de Süßes oda Saures bleckan.
De Natur spuid mit aa no,
daaß oam so vui schiach wern ko!
Dusta is’s, da Nebe steigt,
a leises Summa, wia wann wer geigt.
De Baam de wischpern – Gänsehaut,
wenn ma bloß vor de Tüar nausschaugt!
Wos kümmerts oam des Drumherum,
am scheenan is do in da Stubm!
Do gspannt ma nix vom Geistatum,
des draußn rumspukt umadum.
Do is’s gmüatli, warm und schee,
manch oana duad zum Hoagascht geh,
do werd gsunga, glacht und gspuid,
grod zeam is’s, wei ma woih se fuid!
Koana feieert Halloween,
füa vui is des ja nua a Splin!
Gmüatlicha saan unbestrittn
unsre Bräuch und unsre Sittn!
Allerdings, des is koa Frog,
soi feiern jeda wiaras mog,
d’Hauptsach is, dea Brauch is echt,
na hod er aa sei Fug und Recht!
Halloween – des kimmt vo drent,
Irland und Amerika, des jeda kennt,
und wei mia international uns gebm,
müaßma hoid mit dem aa lebm.
Toleranz des oa, Tradition des anda,
aba Leit, denkts olle mitananda:
Deads ned vagessn unsre Sittn
und unsre Bräuch ned, daad i bittn!
Gedicht und Foto: Ernst Reiter / hö
