Happinger Maibaam-Gschichtn 2023
De Jungbauernschaft Pfraundorf hot si traut
und den Maibaam vo de Happinga klaut.
Auf da B 15 hobn s’, vo da Feiawehr Pfraundorf bewacht,
ganz brav des guate Stück wieda z’ruck bracht.
Weil s’ des 23 Meta lange Trumm hobn müassn umdrahn,
san s’ damit in d’Wiesn eini gfahrn.
Beim Aufstelln warn s’ mit vui Irxnschmoiz dabei.
So ghört si ’s für de Maibaumdieb oiwei.
Des is oide Tradition:
Mit de Schwaiberl hobn s’ fest o’gschobn.
Jungbauernschaft, Trachtenverein Alt Rosenheim und Innviertler
hobn schware Arbeit gmacht
und des guate Stück sauba in de Senkrechtn bracht.
Damit Koana vor lauta Durst vareckt,
hot da Wirt etliche Mass’n zuawe gschleppt.
Ohne Trinka tuat da Mensch drauf geh
und da Maibaam daat heit no net steh.
Wia des Prachtstück endli gstandn is,
Hots gscheit kracht, des warn de Happinger Böllerschützn, gwieß.
Rund 400 Gäst hobn bei dem Spektakel zuagschaut.
Bestimmt net oana hätt sie beim Aufstelln zualanga traut.
De Wasner Musi hot schneidig aufgspuit.
Bei da scheena Untamalung wars Arbeitn hoib so wuid.
Ohne Musi ko ma net gscheit Plattln und Tanzn.
Do war’n de Vereine bei de Aufführunga bled do gstandn.
De Trachtnverein hobn gemeinsam de Ambosspolka plattelt.
De ganz Tanzflächn hot dabei gwackelt.
Danach hobn de Kinda an sauban Auftanz vorgführt,
so, wias sie’s fürn Trachtennachwuchs ghört.
Jetzt war des Muiradl dro,
Do hot ma gsehgn, wer schee drahn ko.
Und de Innviertler hobn an Sterntanz bracht.
So vui Stern auf an Haufa siehgt ma net amoi in da Nacht.
De Goaßlschnoiza vo de Alt Rosenheimer hobns gscheit lassn kracha.
Eahnane Trommefell werd des scho lang nix mehr ausmacha.
De Schnürl san grod so in d’Höh gflogn.
Da Petrus hot bestimmt an Kopf eizogn.
Jetzat wars fällig, des Mittagessn.
De guatn Gickerl warn schnell aufgessn.
Kaffee und Kuacha san wegganga wia warme Semmeln.
Auf amoi is nix mehr do gwen.
Zum Schluss is no de Sunn raus kumma
und hot den scheena Maibaam strahlend in Augnschein gnumma.
Gedicht und Fotos: Marga Leingartner
